كيكة الموز بالكريم كراميل

السلام عليكم
ازيكوا ياحبايب قلبى وكل سنة وانتم طيبين
النهاردة جايبالكوا طريقة كيك جامدة جدا
بس رجائا تلتزموا بالخطوات عشان تنجح معاكم باذن الله
ندخل فى الموضوع
اولا مقادير الكرامل
كوب سكر
نص كوب ماء
ثانيا مقادير الكريمة
2 كوب لبن حليب بارد
3 بيضات
نص كوب سكر
فانيليا
ثالثا مقادير الكيكة
13 معلقة دقيق
موزتين
3 بيضات
نص كوب سكر
نص كوب زيت
نص كيس بيكنج باودر
فانيليا
ذرة ملح
ياللا بسم الله الرحمن الرحيم
-هنحضر صينية مقاس 26 او 28 وندهنها بالزيت من كل حتة عشان الكرامل مايلزقشونحطها فى صينية اكبر منها بشوية
-هنعمل الكرامل ازااااى هنجيب طاسة ونحط فيها كوباية السكر وربع كوب مية ونحطها على النار لحد مايوصل السكر للون الذهبى المحمر هنطفى النار ونحط ربع كوباية المية الباقية ونقلب بسرعة ونحطة فى الصينية المدهونة ونحاول نخلية يغطى قعر الصينية
-نيجى للكريمة هنجيب الخلاط ونحط فيه مقادير الكريمة كلها ونضرب الخليط ضربا مبرحا حتى يستغيث وبعدين نحطه فوق الكرامل بس براحة ونقرب ايدينا من الصينية على اد مانقدر
-نيجى بقى للكيكة هنجيب نفس الخلاط ونحط فية البيض والفانيليا والسكر والزيت والموزتين وذرة الملح ونضربهم ضربا مبرحا حتى يستغيثوا برده وبعدين نحطه على الدقيق والبيكنج باودر بعد نخلهم طبعا ونقلب كويس لحد ماتبقى عجينة بس اتقل من عجينة الكيك العادية شوية يعنى لو عازت دقيق كمان حطى عشان عايزنها تثبت فوق الكريمة وماتقعش منك فى القعر
الخطوة اللى جاية دى مهمة جدا
هنجيب خليط الكيكة ونحطة فوق الكريمة بس نركز ايدينا فى نص الصينية واحنا بنحطه ومانوزعوش هو هيفرش فى الصينية لوحدة
-نسيب الصينية عشر دقايق قبل ماتدخل الفرن على ماتسخنى الفرن وتغلى براد مية
-هنصب المية فى الصينية الكبيرة اللى محطوطة فيها صينية الكيكة لحد ماتوصل المية لنص صينية الكيكة (حمام مائى يعنى) وبعدين نشيل الصينية براحة ونحطها فى الفرن على 180 لمدة 40 او 45 دقيقة ومانفتحش الفرن عليها خالص قبل الوقت ده وبعدين اختبريها بالسكينة لو طلعت نظيفة تبقى استوت ممكن تشغلى الشواية عشان تاخد لون او لو كانت احمرت خلاص طلعيها
-هنشيل صينية الكيكة من الحمام المائى ونسيبها تبرد فى درجة حرارة المطبخ وبعدين نقلبها (هتلاقى الكيكة تحت والكريم كرامل فوقيها) وهو المطلوب اثباتة وتدخليها الثلاجة وبعدين هممممممممم ياجمل وبالهنا والشفا

الكيكة دى بقى حكايتها حكااااية ازاى؟
اولا ممكن بدل الموز تحطى كاكاو وتبقى كيكة شكولاتة بس ساعتها الدقيق هيبقى 8 معالق والكاكاو معلقتين ودى بتبقى خرافة
وثانيا ممكن تبقى كيكة سادة والدقيق بيبقى 10 معالق ودى بتبقى تحفة (برده الدقيق فى الطريقتين دول على حسب ما العجينة تحتاج) ابدئى بس بالمقدار المكتوب وبعدين لو عوزتى تانى حطى
وثالثا الطريقة اللى فوق ههههههه
يعنى من الآخر كده هتعملوها هتعملوها باى طريقة تعجبكم

موضوع جااااااااااامد يا ياسو بتجوعينا انتي وخلاص
[ندعوك للتسجيل في المنتدى أو التعريف بنفسك لمعاينة هذه الصورة]

اووو شكرا نا اكتير بحب المووووز

مرسي على الوصفه
ههههه والله صح مثل ماتقول دود
انتي اجوعينا وخلص اهئ اهئ اهئ